بسم الله الرحمن الرحيم
قررت منذ اليوم أن أبدأ بالكتابة من فترة لأخرى بالدارجة الجزائرية … ولكن لماذا ؟ هكذا حبا في دارجتي و كذلك ليكون صوتي مسموعا لشريحة جديدة من الزوار الجزائريين الذين لا يحبذون كثيرا التحدث بالعربية الفصحى وهي كذلك فرصة ليتحدث الواحد بتفصيل أكثر عن الكثير من القضايا المحلية ….إذن التدوينات سوف تكون موجهة للجزائريين فقط لأني أعلم أن أغلب الشعوب العربية لا تفقه في دارجتنا شيئا لأنها خليط من لغات جميع من استعمرنا سواءا عسكريا أو ثقافيا هههه ؟
يعني بالدارجة من اليوم سي بون راح نولي نهدر جزايرية قح يونمار من العربية الفصحى نحوس نروبوزي شوية عياتني العربية , وماذا بيا التعليقات في المواضيع اللي تكون بالدارجة تكون بالدارجة يرحم والديكم ؟ و ماذابيكم ثاني تخطيونا من الجهوية والعروشية والبن عميس في التعليقات …راهو وقت باش الناس تتعلم شوية دارجة نتاع الجزايريين , ياكلني قلبي ..كيفاش احنا الجزايريين نفهموا اللهجات اللي خلقها ربي كامل وهوما ما يفهموش الدارجة نتاعنا … آو العيب فينا أو ماهوش فيهم على خاطر احنا نحقروا رواحنا بزاف آلور لازم نتحركو شوية وماشي كي قولنا نهدرو بالدارجة يعني العربية ما هيش مليحة ولا كذاش مناش العربية على العين والراس وكل حاجة في بلاصتها
سي بون فهمتوا واش نحوس نقوللكم ؟ رانيي نستنى التعليقات وكيما قلنا بالدارجة .. و انشاء الله نكتبلكم بالدارجة حتان تكرهو مني ههههه أيا دمتم !!
ليست معصيتنا وأعمالنا المنحرفة وماضينا السيء سببا لنمتنع عن النصح والأمر بالمعروف والنهي عن المنكر ...وليس بالمقابل اقترافنا لمنكر قد يبدو هينا سببا للجهر به
-
هههههههه ان شاء الله تمتعنا بالدارجة لاننا نفتقد الى مدونة تكتب بالدارجة مثل اخواننا في الشرق الاوسط.
و بصح انا مانيش راح نكتب في مدونتي بالدارجة كيعاد معظم الزوار من بلدان اخرى .
تحياتي لك
إلياس @ بارك الله فيك خويا على التعليق وانشاء الله راح تشوف بزاف مواضيع غير بالدارجة يعني نتاع حنا في حنا
بصح المدونة نتاعك عجبتني فوور ..
ربي يدوم هناك خويا
سي بون فهمنا
رانا نستناو في خو ,ماطولش.
هي خو.
mhamed@ صح محمد انشاء الله إذا رحمتنا لانترنات هذي نكتبو مواضيع بزا ماتتقلقش برك يا خويا
قريب انشاءالله
السلام عليكم
و علاه لا ، خليونا نجربو ، بلاك نلقاو صدى اكثر عند الجزايريين
باش تلمهم عليك لازم تهدر معاهم بلغتهم حتى يحسو بانتماءك ليهم
فكرة تهبل كيما ولفتنا خالد
ربي يوفقك
كريمة @ هذيك هي ختي كريمة الاحساس بالانتماء هو اللي يجب الناس هنا باش تهدر براحتها
مرسي على التعليق “بالدارجة” .
هااا؟ إيش هي سي بون على أساس إني فهمت الباقي :)
عمر قعدان @ شكرا على الرد في هذا الموضوع بالذات وعلى أساس أنك فهمت ما قيل فأنا أقول لك سي بون يعني بالفرنسية ” جيد ”
هههه
سلاوما عليكم, والله غير آفار تكون البريد اليومي لا بوست دريجة , يخي ريحونا شوية من الافكار اللي نحبو نخرجوها وما نلقاولها غير قوالب عربية خطراش تخرج بينا على المفهوم, ياك صح حنا الجزايريين بون تفكير بصح غير نتحولوا للعربية يصرا فيها التخلاط و التبلاط … على كل فكرة جميلة ولكن نوصيك خالد ما تخلطهاش بزاف رانا نعيدوا حنا منفهموكش , لا خاطرش خوك من الغرب … تحية .
قادة@ صح خويا قادة ما يكون إلا خاطرك رايحين نديروها دارجة ستوندارد تخرج على الغاشي كامل
جميلة جدا لهجتكم بس لازم تخفف علينا شوي فيها لأنه نحب نظل نقرأ مدوناتك
وعلها فرصة جيدة حتى تصبح لهجتكم (هدر جزايرية) مفهومة بشكل ممتاز
موفق
حمزة العمواسي@ شكرا أخي يبدو انك مهتم باللهجة الجزائرية دمت وفيا
الدارجة هي بذرة فناء اللغة العربية,فلو تلاحظ جيدا فستجد نفسك أنك تتحدث بمزيج من
اللغات و الأفكار الغير متناسبة.
يعطيك الصحة خويا لازم اللهجة تاعنا تتنشر في الارض كيما باقي اللهجات الاخرى
علاش واش خاصها لهجتنا ؟؟؟؟
و الله اخاي حتا راها فكرة مخيرة وبنسبة لداكشي لكلتي كان لازم عليك تدكر حتى الدارجة المغربية لحقاش تقريبا نفس الدارجة الجزائرية و حنا كاملين سواء فالمغرب ولا الجزائر نفهمو جميع للهجات العربية و هوما لما حنا نهطرو بالدارجة المغربية يحلو فمهوم و كيما دكرتي لفوت ديالنا حنا
ممم واقيلا بان ليا غادي نسرق ليك الفكرة و تانا نبدا ندون شويا بالدارجة المغربية
أش بان ليك ندير يدي فيديك نتا بالدارجة الجزائرية و انا بالدارجة المغربية و نديرو شي حملة بين المدونين ( دعوة للكلام بلغة الشارع )
بســــــــــــــــــــم الله الرحمن الرحيم
واش اصبحت يا خويا ، كي مسيت؟؟؟ واش حالك ؟ واش راك ؟ ياو راك مترفه و الا مزلزط ؟ ياك على بالك رانا من دمرة لدمر ، الدمرة الاولى دمرة فاتورة التريسيتي ، والدمرة الثانية دمرة مصروف رمضان بسلامتو ما خلى فيها والو هردها كل وخاصة دمرة الفطاري المرة ههذ ياك راها الفطرة بعشرة لاف سنتيم اضربها في عدد الذراري وامهم وزيد الآبوي وما شاء الله ياك احنا ولادين نولدوا ياسر برشة برشة صلاة النبي تعمى عين الحاسد ، عيد الحسود ياك فيها عود ماضي تفقسهالو….. تلقاها ياسر…ياسر و برشة برشة و بالزاف بالزاف على حمار الناس ، وزيد يا سيدي بوزيد البيض والفرينة وخميرة لافاني نوارة نوارة نوارة يابنات الحارةوووووو
والله فرغت الشكارة ما باقي فيها والوووووووو ، مـــــــــــــــــا تنساش كسوة العيد دمرة تنسي دمرة والايام فايتة……هكذا يروح العمر من تكلاحة لتكلاحة…. قال لك كاين واحد سول واحد قالو رمضان زين والا شين قالوا على طـول رمضان شين شين ولو كانو زين ما يديروا وراه عيد هههههههه
ياو ياو يــــــــــــــــــاو إ سمع لي وصدلي الهون أقطع النفس واعطيني وذنيك للثنين نسيت
الدمرة الكبيرة ما قلتهاش لك……اعرفتها و الا مازال….ياو أنقولهالك قي تلفخ راسك عل حيط متين وتغرس في كرشك سكين يا مسكين…..وما عندك عليها لا هربة وين….قولي عرفتها والا انحلك ذوك الوذنين…هي هي هي القراية انتاع الذر يا طحان…..انسيت منين كنت تتزوج بكري وتولد في الذر…..ياو والله يا الا اتبع الذر قي يبقى طول عمرو ذر…….
ياسيدي زيد ، سيدي يزيد ، هذاك البوبكر بن بوزيد الله انقص عمرو لا يزيد…..هذه كتب هذه كراريس يــــــــــــــاو هذه طابليات:::: الوان وردي قلنا ما عليهش أما اللون لزرق وقالوا ما عليهش كي يكونمعاه اللوت لبيض معناها علام اليهود والحمدو لله الجمعة راحت مع المرحوم بومدين لحقت صاحبها وبقالنا سبت اليهود ….ميش هذه دمرة اخــــــــــرة……قلي بربي عاد منين انجيب برشة برشة مليمات والا سنتيمات الشهرية ميتـــة وراني عايش بالدين وجهي مصفار ….لازمني ما عدتش نخرج من الدار نتحجب على المدايين……والا لا زمني نشوف وحدة موظفة نلصق فيها حتي بزواج حجاج باش تعاوني نسلكوا المدايين واذا كان لقات راجل راني نخليها تروح على روحها واذا كانت قبلت المرا الاولى معاها أنا راني ما انقولش لالالالالالا
وبعد ما تريح شوية ينطحك كبش العيد على دمغليتك اكسرهالك وبعدها والله شيء ما يحلالك وتزلط حتي يتقطو جيوب سروالك…..شفت يا خويا الحياة كي عادة مرة……
الذراري رايحين المرة هذه يضبعو يعني يهبلو زادولهم سوايع القرايا بالزاف 8 سوايع في اليوم 4 في الصباح و 4 في العشوة وبيناتهم 1 ساعة راحة يعني من 12 الى 1 هذه الفترة بفطر فيها الطفل ويروح لدارهم ويرجع ، شـــــــــــــــــوف عبقرية بن بويـــــد يجيبول ان شاء الله ضربة بمطرق حديد على ذاك الراس تكسرولو …… والسنة على بالك بدات القراية بكري من سبتمبر حتى 20 جوان نسى بالا اصحاب الصراء عندهم الحمان بالزاف 50 درجة حمان..واش بيه هذا الوزير ضبع والا اهبل ؟؟؟؟ ما عنوش المخ والا ما عندوش الا ادبر اعليه زعم لعبها فاهم…….قولو برنامجك الزين يا بارد الوجه ……يا بارد القميلة ، وراك مازال تتحدث وعاجبك الحال…..ياك هاهم الا قريتهم يشربو في الديفان ويسرقو في صاكات النسوان ويقلقوا بمشاكلهم الاهل والجيران والا عندهم الشهايد راهم قاعدين تحت الحيطان..والا زعم راهم فاهمين شوية شدو بعض المسؤوليات هاهـــــــــــــــــم يشدو في الرشوة ويسرقوا في المال العام……وين راك رايح يا بن بوزيـــــــــد ؟ الحق موش فيك انت ، الحق في القابلة الا بشرت بيك وقطعتلك صرتك والله أحسن لو كان راها بعجتك هنات الآرض منك ومن عبقريتك الفاسدة…..المثل يقول :::: تبع العتروس يديك لسدرة :::: شجرة السدرة هذه ما فيها لا ظل ولا والو فيها الشمس والشوك العياذ بالله….
روح …روح اسلمك لوح هذا البرنامج في الزبلة…..هذا البرنامج الا ما إكلش خبز ما يلزمناش..
إنت ما دام جبت يوم السبت روح لليهود جيبلنا من عندهم برنامج تعليمي انتبعوه بالقارانتي في مدة عشر اسنين نولو رجالة انتاع الصح انعودو نا كلوا ونوكلو غيرنا يعني نغناو وما عدناش نستحقوا حتى واحد ونصنعو القنبلة الذرية قولو انشاء الله تتفلق على راس بن بوزيد ادششهولو يبقى فريسة بلا راس……راهم امات الذراري كامل يدعو عليك ويقولو يهدم ساسو ويقطع راسو وانحو على ناسو….آمين ببركة العيد والعواشير.
تحياتي والحديث راه مازال ما اقضاش.